Hasiera Ironchipen
Mountaga Sow naiz, Harrobia Ikastolako Marketin eta Publizitateko Goi Mailako Zikloko ikaslea, eta ikasturte honetan prestakuntza Duala Ironchip enpresan egin dut. Ironchip zibersegurtasunaren sektorean lan egiten duen enpresa teknologikoa da, eta bertan komunikazioarekin, diseinuarekin, branding-arekin, edukiaren sorkuntzarekin eta marketin-taldeari laguntzearekin lotutako lanak egiteko aukera izan dut.
Nire harremana enpresarekin prestakuntza Duala hasi baino lehenago hasi zen, zeren eta aurreko ikasturtean hiru asteko praktikaldia egin nituen Ironchipen, eta ondoren enpresak ekainean kontratatu ninduen Senegalera joan baino lehen. Hasiera batean Duala uztailean hastekoa zen, baina Senegalera joan nintzenez, irailean hasi nintzen berriro enpresan, eta esperientzia hori ekainera arte luzatuko da.
Nire eginkizunak Dualean
Denbora honetan, nire funtzio nagusia diseinu grafikoaren, komunikazioaren, edukiaren, branding-aren eta aurkezpen komertzialen inguruan garatu da. Bereziki, arrakasta-kasuak, aurkezpen komertzialak, materialen birdiseinuak, LinkedIneko edukiak eta ekitaldietarako materialak landu ditut, bai webinarretarako bai aurrez aurreko ekitaldietarako. Azken etapa honetan, gainera, HubSpot bidezko prospekzio komertziala ikasten hasi naiz.
Ekitaldiak eta branding-a
Esperientziaren zatirik interesgarrienetako bat ekitaldietara joateko aukera izan da. Ekitaldi horietan profesional desberdinak ezagutzeko, haiekin hitz egiteko, argazkiak ateratzeko eta ondoren LinkedIn bidez harremana mantentzeko aukera izan dut. Horri esker, hobeto ulertu dut enpresa batek bulegotik kanpo nola aurkezten duen bere burua, nola sortzen dituen harreman profesionalak eta nola eraikitzen duen konfiantza ingurune errealetan.
Branding-arekin eta markaren eraikuntzarekin lotutako lana ere oso interesgarria iruditu zait. Aurkezpenen, arrakasta-kasuen eta komunikazio-materialen bidez, ikasi dut enpresa teknologiko batek nola komunikatzen duen bere balioa, nola egokitzen duen mezua publiko desberdinetara eta nola bihurtzen dituen soluzio teknikoak mezu argiago, bisualago eta komertzialagoetan.
Ikaskuntza nagusiak
Ikaskuntza nagusietako bat izan da enpresa teknologiko batek nola funtzionatzen duen ulertzea: nola mugitzen den merkatuan, nola lortzen dituen bezeroak, nola saltzen duen eta nola hartzen diren erabakiak. Ironchipen egunero daily meeting-ak egiten dira, taldeko pertsona bakoitza zertan ari den jakiteko. Horrez gain, egutegi partekatuak erabiltzen dira bilerak antolatzeko eta taldearen koordinazioa hobetzeko. Horrek erakutsi dit komunikazio internak, rol argiek eta antolakuntzak duten garrantzia.
Hasierako zailtasunak
Hasieran, zailtasunik handiena hizkuntza teknikoa ulertzea izan zen. Zibersegurtasuneko enpresa batean egonik, komunikazioaren zati handi bat IT managers, CISO edo arduradun teknikoei zuzenduta dago; beraz, hiztegi batera eta komunikatzeko modu oso desberdin batera egokitu behar izan nuen. Oraindik ikasten jarraitzen badut ere, zailtasun horrek ideia teknikoak mezu ulergarriago eta bisualago bihurtzeko gaitasuna hobetzen lagundu dit.
Laguntza eta jarraipena
Nire gainbegiralea, Maria, esperientzia honen zati garrantzitsu bat izan da. Hasieratik oso hurbila izan da nirekin, eta taldearen barruan beste bat bezala sentiarazi ninduen. Bere laguntzari esker, hobeto integratu nintzen, enpresaren funtzionamendua ulertu nuen eta ardura berriak hartzeko konfiantza handiagoa izan nuen. Bestalde, Zuriñeren jarraipena ere oso garrantzitsua izan da prozesu honetan. Praktikaldian zehar beti egon da prest enpresarekin sor zitezkeen zalantzak edo gorabeherak bideratzeko, eta aldizka galdetu dit nola nengoen Ironchipen eta nola ari nintzen bizitzen esperientzia. Bere gertutasunak eta jarraipenak lagundu didate prozesu osoan zehar babestuta eta entzunda sentitzen.
Balorazio pertsonala
Prestakuntza Dual hau esperientzia oso aberasgarria eta polita izan da niretzat. Komunikazioari, talde-lanari, diseinuari, branding-ari eta enpresa baten barne-funtzionamenduari buruz asko ikasteko aukera eman didalako. Gainera, ekintzailetzarekiko dudan interesa indartu du, izan ere, esperientzia honen bidez konturatu naiz etorkizunean nire talde propioa sortzea, proiektuak zuzentzea eta ikuspegi argia duten markak garatzea gustatuko litzaidakeela.
Orokorrean, Ironchipen izandako esperientziak profesionalki eta pertsonalki hazten lagundu dit. Zikloan ikasitakoa ingurune erreal batean aplikatzeko aukera izan dut, erronka berriei aurre egin diet eta hobeto ulertu dut marketinaren eta komunikazioaren barruan zein arlo egokitzen diren gehien nire profilarekin. Esperientzia oso positiboa izan da, eta etorkizun profesionalean erabiliko ditudan ikaskuntza asko eramaten ditut nirekin.