Aitor Urtzelai naiz, marketin eta publizitate zikloko ikaslea, eta nire praktikak Basoas enpresan egin ditut. Enpresa txikia izan arren, eguneroko lanean gauza asko ikasteko aukera izan dut, eta hasieratik oso gustura egon naiz bertan, giro ona egon delako eta lan egiteko modua gertukoa eta erosoa izan delako.
Praktiketan zehar hainbat zereginetan parte hartu dut. Alde batetik, paketeriarekin eta eskaeren prestaketarekin aritu naiz, produktuak nola kudeatzen diren eta bezeroari bidalketa-prozesu osoa nola antolatzen den ikasiz. Horrez gain, e-commerce mundua barrutik ezagutzeko aukera izan dut, eta horrek lagundu dit ulertzen enpresa txiki batek zenbat lan duen atzean.
Bestetik, komunikazioarekin eta marketinarekin lotutako lanak ere egin ditut. Edukiak prestatzen, ideiak proposatzen eta proiektu berriak aztertzen aritu naiz. Esperientzia honen barruan, bereziki interesgarria izan da Four Clubs izeneko proiektuan parte hartzea. Proiektu honen helburua diskotekentzako produktuen banaketa lantzea da, hala nola argiak, kubiterak, edalontziak, kopak edo botilentzako euskarriak.
Horrez gain, Four Clubsen barruan beste ideia berritzaile bat ere landu dugu: diskoteka batean vending makina bat jartzea, bertan bai aisialdiarekin lotutako produktuak bai premiazko beste produktu batzuk saltzeko. Proiektu hau sortzaileagoa eta praktikoagoa izan da, eta oso baliagarria izan zait merkatura produktu edo zerbitzu berri bat nola hurbildu ulertzeko.
Orokorrean, praktikek asko irakatsi didate bai maila profesionalean bai pertsonalean. Ikasitako guztiaz gain, benetan eskertzen dut Basoasen eman didaten konfiantza eta bizi izan dudan esperientzia.
Ander Romero Garcia naiz, Marketin eta Publizitateko zikloko ikaslea, eta praktikak egiten ari naiz Eñutt komunikazio agentzian, Erandion.
Nire esperientzia Eñutten
Eñutten egindako praktiketan asko ikasi dut, bai marketinaren arloan, bai agentzia baten eguneroko funtzionamenduan. Esperientzia honetatik gehien gustatu zaidana eta gehien nabarmenduko nukeena Eñutten lan-taldea izan da. Talde txikia izan arren, 5 pertsonakoa, 6 CEOa kontuan hartuta, oso talde profesionala eta prestatua dela iruditu zait. Asko gustatu zait haiekin lan egitea, bakoitzak bere arloan oso ona delako lan. Nire ustez, Eñuttek agentzia handiagoen maila berean lan egiten du.
Praktiketan ikasitakoa
Nire ikaskuntzari dagokionez, aukera izan dut marketineko tresna eta prozesu errealak ezagutzeko. Adibidez, Clientify bezalako CRM bat erabiltzeko aukera izan dut, eta oso tresna interesgarria iruditu zait bezeroak, kontaktuak eta aukera komertzialak antolatzeko. Gainera, agentziaren kolaboratzaileetako bat izanik, gertutik ikusi ahal izan dut nola erabiltzen den horrelako plataforma bat lan profesional batean.
Praktiketan egindako eginkizunen artean, datu-baseak lantzea, kontaktuak antolatzea, komunikazio-kanalak aztertzea, edukiak prestatzea eta kanpaina baten planteamendua ulertzea egon dira. Horrek guztiak lagundu dit ikasgelan landutakoa egoera errealetan aplikatzen. Harrobiari dagokionez, egia esan, oso balorazio ona egiten dut, klasean ikasitako gauza asko bezero eta proiektu errealekin lotzeko aukera izan dudalako.
Batzuetan, ikasgelan egiten diren ariketetan pixka bat desanimagarria izan daiteke jakitea lan hori ez dela benetako bezero batengana iritsiko. Horregatik, Eñutten lan egitea oso esperientzia aberasgarria izan da niretzat, hemen egindakoak testuinguru erreal bat duelako eta taldeari laguntzeko balio duelako.
Bestalde, Iñaki, Eñutten CEOa, ideia askoko pertsona dela iruditu zait. Nik bezalakoa, eta alde horretatik oso interesgarria egin zait haren lan egiteko modua ikustea. Eñutteri ezin zaio alde sortzailea kendu: agentzia sortzailea da, eta hori proiektuetan, planteamenduetan eta lan egiteko moduan nabaritzen da.
Gainera, Eñuttek dituen proiektuak eta kolaboratzaileak oso interesgarriak iruditu zaizkit. Agentzia txikia izan arren, egiten duten lanaizugarria da.
Azkenik, aipamen berezia egin nahi diot nire instruktoreari, Davidi. Praktikaldian zehar asko irakatsi dit, eta oso lagungarria izan da niretzat. Eskertzekoa izan da nire zalantzak argitzea, lana azaltzea eta prozesuetan gidatzea.
Balorazioa
Laburbilduz, Eñutten egindako praktikak oso esperientzia positiboa izan dira. Asko ikasi dut, oso talde on batekin lan egiteko aukera izan dut, eta marketinaren mundua modu errealago batean ezagutzeko balio izan dit. Espero dut Eñutteko talde osoari oso ondo joatea etorkizunean.
Orain, agentziako bistak utziko dizkizuet. Agian ez daude zuzenean praktikekin lotuta, baina aipamena merezi dute.
Praktikaldian, Bilbo Zaharreko eta Zabala auzoko merkatarien elkartearekin aritu naiz elkarlanean, komunikazioan, kudeaketa digitalean eta ekitaldien antolaketan lagunduz.
Taberna eta saltokiekin harremanetan jarri naiz WhatsApp bidez, argazkiak atera eta sare sozialetarako edukiak prestatzeko lanetan aritu naiz. San Frantziskoko Pintxo Ibilbidea antolatzen ere parte hartu dut, eta WordPress bidez webgunea eguneratzen lagundu nuen, establezimendu berriak gehituz eta bakoitzaren geokokapena sartuz, Excel-en bidez kudeatutako datuekin.
Era berean, SanFran Motor eta Pintxo Nazarenoaren Ibilbidea bezalako ekitaldietan parte hartu dut, auzoa dinamizatzeko kulturaren eta ostalaritzaren garrantziaz jabetuz.
Esperientzia oso aberasgarria izan da, non komunikazio trebetasunak garatu, tresna digitalekin trebatu eta kalean benetako proiektuetan lan egin dudan.
Aurreko astean marketin eta publizitateko zikloan BilboTikRa-rekin Bilbo hiriko etorkizuneko gizarteari buruz hausnartzeko saio bat izan genuen. Ikasleok etorkizuneko Bilbo irudikatu genuen: auzoetatik hasita, Bilboko bihotzeraino. Proiektu hau etorkizunerako bidaia izan da; nondik gatozen eta nora goazen hausnartzen laguntzen diguna. Etorkizun ateseginago, zilegiago eta jasangarriago aztertu eta imajinatzea du helburu.
Marketin eta Publizitateko ikasleak inguruko jendearekin konektatzeko aplikazio ezberdinen prototipoak diseinatu genituen. Hona hemen diseinatutako aplikazioen naming batzuk:
Konektatu SocialHood Etéreo Elkarbar
Saio honetan, besteak beste, aplikazioaren target-a, helburua, funtzionalitatea, diseinua, eta eskakizunak zehaztu zituzten. Harrobiako marketineko ikasleok sormena lantzeko aukera paregabea izan genuen. Zein garrantzitsua den une batez gelditzea eta etorkizunak zer ekarriko duen pentsatzea!
Aste honetan Kahlomedia publizitate agentziako Iñigo Azkona izan dugu marketin zikloan bere agentziako egunerokoa aurkezten. Gure ikasleek aukera izan dute bezeroarentzako kanpaina bat sortzerako orduan lan taldea eta antolakuntzaren garrantziaz hausnartzeko.
Gainera, zeharkako gaitasunak landu ahal izan ditugu publizitate arduratsua egiten duen agentzia baita. Haien ustetan “Komunikazioan eta publizitatean lan egitea posible da berdintasuna, elkartasuna eta tolerantzia bezalako baloreak errespetatuz arlo guztietan”
